Sigurado ka ba sa gagawin mo?
Tandaan mong hindi mo na matatahi ang mukha ko
O ang suso ko,
O ang puson ko. (wag mong kalimutan diyan ka rin nanggaling)
Hindi mo na uli’t maririnig ang kanta ko
Kung biniyak na ang labi ko at pinasirit ang
Halo ng lipstick-at-dugo;
Hindi mo na mararamdaman ang himas-pampatulog
pag kinalas na ang mga daliri
kong pinamanicure ko pa naman. (para sana sayo)
Wala na. Tandaan mo yan.
Ibebenta mo ang atay ko, ang kidney ko,
Ang kalamnan ko, ang bituka ko, ang matress ko (wag mong kalimutan diyan ka rin nanggaling)
Ang baga ko, ang puso ko, ang utak ko, ang retina ko,
Ang puke ko, ang buhok ko, ang kuko ko, ang dila ko
Lahat ng laman ko, Maibebenta mo. Pero tandaan mong hindi ako manika.
Hindi mo na ulit ako matatahi pa.
